නිතර ඇහෙන සින්දුවල පද පේලි අතරේ හැංගුණු රහස් ඕනෑතරම් තිබෙනවා. ඒවා ටිකක් කල්පනා කරලා බිඳලා ගත්තා ම පිස්සු හැදෙන ලොජික් තමයි ඒවයි තියෙන්නේ. මේ ඒ වගේ අන්ධභූත කථා තියෙන සහ කථා හදන්නට පුළුවන් පරණ සින්දු ටිකක්.
ලස්සන රත්තරන් බබෝ
මුතු ඇටයක් නේද බබෝ
සුවඳ මලකි ඔයා බබෝ
දෙයියො දුන්න පුංචි බබෝ
මේ සිංදුවේ බබා කාගෙද කියලා නොකියා කියනවා. දෙයියෝ දුන්නා කියලා කිව්වාට චිත්‍රපටයේ නම තමයි: සැමියා බිරිඳගේ දෙවියා ය. දැන් ඔබට පුළුවන් සමගාමී සමීකරණය විසඳගන්න. ඒ වගේ ම,
ගල් රූපයක් උනත්, කතා කරයි ඔබට බබෝ
කියන පේළියෙන් නම් හිතෙන්නේ බබා ගල් රූපයක්; ඒත් අපි එයාට කතා කරනවා. ඒ කිව්වේ ප්ලාස්ටික් බෝනික්කෙක් එක්ක සෙල්ලම් කරනවා වගේ.
කඳුළු දෙන්න මට හඬන්න
සත් සමුදුරු ගොඩ ගලන්න
මේක ඇහුණා විතරයි පොලීසියෙන් ඇවිත් කඳුළු ගෑස් ගහගෙන ගහගෙන ගියා!
සැඳෑ කළුවර කුර ගගා විත්…
ඔබේ ලෝකය මගේ ලෝකය
අතර ඇත්තේ රැයක් පමණයි
ඒ කියන්නේ පෙම්වතා ඉන්න කාල කලාපය අනුව ඔහුට රාත්‍රියලු. ලංකාවට සාපේක්ෂව බැලුවොත්, ඔහු ඉන්නේ ඇමරිකාව පැත්තේ වෙන්නට ඕන.
සුපෙම් හැඟුම් ඔබෙන් එපා මිතුරුදම් විනා
“අපි යාළුවො වගේ ඉමු” කියලා Friendzone කරන එක අළුත් මැජික් එකක් නෙවෙයි. ඒ කාලෙත් ඒක තිබිලා තියෙනවා.
හිරු ද මුවාවී ලැසි ගමන බලාවී
සහ
සායම් කිරිල්ලී කොහේ ගියාදෝ – මා දම් කැළෑවේ මුවා වුනාදෝ
මේ ගීත දෙකෙන් ම කියන්නේ ඉරට සහ සායම් කිරිල්ලිට මුවෙක් විධියට වෙස් වලා ගැනීමේ අපූරු හැකියාවක් තිබෙන බවයි.
එදා රෑ ගුවන්තොටුපොළේ දී මා
වෙන්වී ගියේ සිතකින් නොවේ
හිතකින් නෙවෙයි ඉතින්, ප්ලේන් එකකින් නෙව!
චන්දන ඇඟ ගාලා
කොණ්ඩෙ කඩා දාලා
කවුද යකෝ චන්දන? 😛
මාගෙ පැල්පතේ ඉසුරු නෑ කියා
ඔබ මගෙන් වෙන්වුණා
මේ සින්දුවෙන් තේරුම් ගන්න ඕන දේ තමයි, බඳිනවා නම් මුලින් ම ‘ඉසුරු’ කියලා නම තියෙන කෙනෙක් ගෙදර ගෙනත් තියාගන්න. නැත්නම් හාමිනේ දාලා යනවා.
එගොඩත් මෙගොඩත්
ගම් යා කරලා
පාලම සාදා බලා හිඳින්නම්
පාලම් හදන්න සිමෙන්ති අනාගෙන හෙන ගේමක් දෙන්න ඕන නෑ. ගම් වලින් පුළුවන් අලවන්න.
සිලිං පහයි වැල
උඩහ ගෙදර මැගි
නෝනට මේ දැන් වික්කේ
ඒ කාලේ දැනට වඩා බිස්නස් mind එකක් මිනිස්සුන්ට තිබිලා තියෙනවා. ‘වැල’ විකුණලා හරි ගාණක් හොයාගන්න එක බල්ලො මරලා සල්ලි හම්බ කරනවාට වඩා නම්බුකාරයි වගේ. මැගි අක්කාට දෙද්දි ඩිස්කවුන්ට් දෙන්නත් අමතක කරන්න එපා.
පුන් පෝදා සඳ ඔබ ගෙන ආවොත්
මල් වට්ටියකට අරගන්නම්
අන්දරේ කුඹුරක තිබුණු ගලක් අයින් කරපු හැටි දන්නවානෙ? මගේ කරෙන් තිබ්බොත් මං ඒක වෙන තැනකට ගෙනියන්නම් කිව්වා. මේකත් ඒ වගේ. මල් වට්ටියකට හඳ අරගන්නේ ඔබ ඒක ගෙනාවොත් විතරයි. ගේන්න බැරිනං බම්බු ගහපං!
මිනිසා සුවඳයි මළ සේ
සින්දු ඇහෙද්දි අපිට මොකෝ න-ණ, ල-ළ භේදය ඇහෙන එකක්යැ? ඒ හින්දා සුවඳ මල ද ගඳ මළ ද කියලා තේරුම් බේරුම් කරගන්න ‘මිනිසා’ත් එක්ක අමාරුයි.
මාලතී වසන්තේ – මාරුතේ සැලෙන්නේ
මේ පහන් රැයේ – ඈ කොහේ ගියේ
තාරකා අසන්නේ
තාරකාටත් ඕන නැති මඟුලක් නෑ, නේද? 😀
පාරමී පුරා ගෙනා මනාලි වාසනා
ගෙනාපු මනමාලිගෙ නම දැනගන්න කැමතිනම්, ඒකත් වාසනාවට සින්දුවේ ම හංගලා තියෙනවා.
ඔබත් මේ විධියට අහලා තියෙන සින්දුවල කාටවත් නොතේරුණු දේවල් තියෙනවා නම් Comment එකකින් ඒවාත් මේකට ම එකතු කරන්න. 😉